Для домашней молитвы
Кондак 1
Избра́нный уго́дниче Христо́в, блаже́нне о́тче Андре́е, с ю́ных лет по́двиг отрече́ния от благ жите́йских избра́вый, хвале́бное пе́ние прино́сим тебе́ ны́не, чту́ще святу́ю па́мять твою́. Ты же, я́ко име́яй ве́лие дерзнове́ние к Милосе́рдному Го́споду, от вся́ких нас бед и напа́стей свободи́, да зове́м ти: ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Икос 1
Ангелоподо́бное житие́ провожда́л еси́, блаже́нне Андре́е, по ра́нней бо сме́рти благочести́вых роди́телей твои́х отве́ргл еси́ ми́ру су́етное служе́ние и вся его́ ло́жныя красоты́. Того́ ра́ди услы́ши от нас похвалы́, тебе́ приноси́мыя:
Ра́дуйся, до́браго ко́рене о́трасле благоче́стная;
ра́дуйся, ча́до моли́твы роди́телей боголюби́вых.
Ра́дуйся, от рожде́ния твоего́ Бо́гом избра́нный;
ра́дуйся, от де́тства по́двиг юро́дства на себе́ возложи́вый.
Радуйся, не́мощи пло́ти безро́потно носи́вый;
ра́дуйся, си́лою Бо́жиею укрепля́емый.
Радуйся, на земли́ не име́вый где главу́ подклони́ти;
ра́дуйся, к небе́сному жи́тельству предуста́вленный.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 2
Ви́деша лю́дие гра́да Симби́рска престра́нное твое́ житие́: ты бо, вся́кое о пло́ти сме́ртней презира́я попече́ние, в зной и сту́жу в ру́бище облача́шеся, ве́рою те́плою и любо́вию пла́менною ко Христу́ согрева́емый. Темже ве́рнии, зря́ще бла́гость и смире́ние твоя́, Ду́хом Святы́м ти низпо́сланныя, воспе́ша Бо́гу: Аллилу́иа.
Икос 2
Ра́зум, от Бо́га тебе́ да́нный, во мни́мом безу́мии сокры́л еси́, блаже́нне; в безгла́сии свое́м положи́л еси́ хране́ние усто́м, но непреста́нно в се́рдце свое́м моли́твы о лю́дех Го́споду приноси́л еси́. Мы же, удивля́яся таково́му житию́ твоему́, взыва́ем хвале́бно:
Ра́дуйся, вся́кое упокое́ние пло́ти своея́ отве́ргий;
ра́дуйся, зно́й и сту́жу, хвалу́ и поноше́ния благоду́шне терпе́вый.
Ра́дуйся, плоть свою́ ду́ху порабо́тивый;
ра́дуйся, ду́шу свою́ смире́нием обогати́вый.
Ра́дуйся, сокрове́нно моли́твы своя́ ко Го́споду возноси́вый;
ра́дуйся, та́йная се́рдца людска́го ве́девый.
Ра́дуйся, дар прозорли́вости моли́твами свои́ми стяжа́вый;
ра́дуйся, да́ром сим стра́ждущим послужи́вый.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 3
Невозмо́жная от челове́к Го́сподем содева́ется, и си́ла Бо́жия в не́мощех соверша́ется: немощны́й бо ве́чнаго врага́ попира́ет отверже́нием себе́ Христа́ ра́ди. Укрепи́, блаже́нне о́тче Андре́е, моли́твами твои́ми и нас, в мяте́же су́етнаго жития́ сего́ изнемога́ющих, да сподо́бимся с тобо́ю в Небе́сных черто́зех воспева́ти песнь: Аллилу́иа.
Икос 3
Ве́дяще, блаже́нне, еще́ в земне́м житии́ тя прови́дца суде́б челове́ческих явле́нна, цели́теля неду́г мно́гих и уте́шителя ско́рбных, немощны́я укрепля́ющаго и заблу́ждшия на путь пра́вды наста́вля́ющаго, и доны́не ве́рнии к по́мощи твое́й прибега́ют, воспева́юще си́це:
Ра́дуйся, благо́му и́гу Христо́ву подклони́выйся;
ра́дуйся, позна́вый, я́ко бремя Его́ легко́ е́сть.
Ра́дуйся, земно́е мудрова́ние в себе́ умертви́вый;
ра́дуйся, го́рнюю сла́ву прови́девый.
Ра́дуйся, ру́бищем па́че оде́жды златотка́нныя украси́выйся;
ра́дуйся, мни́мым безу́мием сия́ние благода́ти сокры́вый.
Ра́дуйся, поруга́ние и злострада́ние претерпе́вый;
ра́дуйся, в ра́дость Го́спода своего́ возше́дый.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 4
Ви́дим тя, блаже́нне Андре́е, но́вую светоза́рную звезду́, чу́дно возсия́вшую на тве́рди Це́ркве Росси́йския, я́вльшуюся в после́дняя вре́мена, и нам, су́щим в горды́не и прельще́нии ума́ своего́, показу́ющую высоту́ смире́ния и любве́, науча́ющи ве́рных пе́ти Бо́гу: Аллилу́иа.
Икос 4
Ду́хом прови́дя преподо́бный Серафи́м Саро́вский ди́вное житие́ твое́, блаже́нне о́тче Андре́е, кре́пкаго предста́теля и моли́твенника гра́ду Симби́рску тя наименова́. Мы же, дивя́щеся таково́му о нас, недосто́йных и жестокосе́рдых, смотре́нию Бо́жию, во умиле́нии зове́м такова́я:
Ра́дуйся, за́поведи Христо́вы испо́лнивый со тщанием;
ра́дуйся, ду́шу свою́ я́ко жертву соверше́нну Бо́гу принесы́й.
Ра́дуйся, вся́каго теле́снаго поко́я бежа́вый;
ра́дуйся, ми́ра преми́рнаго испо́лненный.
Ра́дуйся, в житии́ свое́м я́ко дитя́ себе́ ума́ливый;
ра́дуйся, во оча́х Христо́вых тем вознесе́нный.
Ра́дуйся, я́ко престо́лу Царя́ Сла́вы ны́не предстоиши;
ра́дуйся, я́ко оте́чество свое́ не оставля́еши.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 5
Боготе́чней звезде́ уподо́бился еси́, блаже́нне о́тче Андре́е, я́ко житие́м твои́м освети́л еси́ преде́лы симби́рския, блиста́яй ве́лиим по́двигом себе́ отверже́ния, и нас, в бу́рях страсте́й мо́ря жите́йскаго погиба́ющих, направля́еши к ти́хой при́стани спасе́ния посо́бием моли́тв твои́х. Мы же, прославля́юще просла́вльшаго тя Го́спода, вопие́м Ему́: Аллилу́иа.
Икос 5
Ви́деша челове́цы, я́ко сподо́бил тя Госпо́дь, блаже́нне о́тче, им послужи́ти и посла́л ти дар целе́ния неду́гов пло́ти немощны́я: стра́ждущим бо подава́л еси́ хлеб, и чрез него́ си́и от Милосе́рднаго Бо́га исцеле́ние приима́ху. Ны́не же в черто́зех Небе́сных хлеб жи́зни ве́чныя вкуша́еши и мо́лиши за нас, те́лом и душе́ю немощству́ющих и к тебе́ во умиле́нии взыва́ющих:
Ра́дуйся, изво́ливый примета́тися у до́ма Бо́жия;
ра́дуйся, я́ко еле́нь стреми́выйся на исто́чники благода́ти.
Ра́дуйся, ве́ры и благоче́стия побо́рниче;
ра́дуйся, Це́ркве Святы́я храни́телю.
Ра́дуйся, любо́вию к Бо́гу дух воспламени́вый;
ра́дуйся, град твой от о́гненнаго запале́ния изба́вивый.
Ра́дуйся, бе́дствующим ско́рый помо́щниче;
ра́дуйся, во озлобле́нии су́щих свободи́телю.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 6
Пропове́дник и о́браз ева́нгельскаго жития́ был еси́ в терпе́нии и кро́тости, блаже́нне Андре́е, я́ко, ви́дя высоту́ смире́ния твоего́, дарова́ тебе́ Госпо́дь дар зре́ния та́йных и сокрове́нных. Да́ром сим мно́гих от поги́бельнаго пути́ греха́ на стези́ покая́ния наста́вил еси́. Мы же, ви́девше о тебе́ такова́я, Бо́гу пое́м: Аллилу́иа.
Икос 6
Возсиява́ше тебе́ мно́гажды от Го́спода, блаже́нне, ве́дение о ско́рой кончи́не челове́ка, ты же, о его́ души́ безсме́ртней пеки́йся, подава́л еси́ иму́щему умре́ти ви́димый знак, персть земну́ю или́ ще́пу в десни́цу влага́я. Сие́ ве́дуще, и мы со смире́нием к тебе́ припа́даем, да умо́лиши Спа́са душ на́ших христиа́нскую кончи́ну дарова́ти всем, вопию́щим ти такова́я:
Ра́дуйся, ве́рным на стезя́х Христо́вых предше́ствуяй;
ра́дуйся, гре́шных к покая́нию наставля́яй.
Ра́дуйся, пра́ведниче, от люде́й поруга́ние прия́вый;
ра́дуйся, засту́пниче им, Бо́гом да́нный.
Ра́дуйся, от поги́бели неча́янныя мно́гих изба́вивый;
ра́дуйся, в та́йне соде́янная обличи́вый.
Ра́дуйся, ран грехо́вных ско́рое врачева́ние;
ра́дуйся, отча́явшихся наде́ждо.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 7
Хотя́щу тебе́, блаже́нне Андре́е, от земна́го жития́ разреши́тися, возжеле́л еси́ приобщи́тися Честна́го Те́ла и Кро́ве Христа́ Бо́га на́шего, и́хже сподо́бився, просвети́лся еси́ ра́достию Небе́сною; чту́щия же тя, сте́кшеся ко сме́ртному одру́ твоему́, ви́дяху ра́дость твою́ о Го́споде и то́ки умиле́нных слез пролива́ху, пою́ще к Бо́гу: Аллилуиа.
Икос 7
Но́вое зна́мение благоволе́ния Своего́ яви́ Госпо́дь нам, жестоковы́йным, удостове́ри бо Той честны́я мо́щи твоя́, блаже́нне, чудесы́ мно́гими, и откры́ дото́ле сокры́тая. Мы же, моли́твенника и предста́теля пред Бо́гом тя ви́девше, благода́рно се́рдцем и усты́ вопие́м ти:
Ра́дуйся, смире́нием высо́кая стяжа́вый;
ра́дуйся, терпе́нием, я́ко по́ясом златы́м, препоя́санный.
Радуйся, себе́ отверже́нием Бо́гу угоди́вый;
ра́дуйся, за незло́бие блаже́нством увенча́нный.
Ра́дуйся, во́ине Христо́в непобеди́мый;
ра́дуйся, врачу́ ско́рый и безме́здный.
Ра́дуйся, во оби́тели Небе́сныя со святы́ми возше́дый;
ра́дуйся, и от нас ду́хом любве́ твоея́ не отступи́вый.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 8
Стра́нно есть зре́ти чту́щим святу́ю па́мять твою́, блаже́нне Андре́е, ка́ко ру́це нечести́вых оскверни́ша ме́сто упокое́ния твоего́, егда́ бу́ря безу́мнаго безбо́жия разруши́ держа́ву Росси́йскую, Це́рковь же Бо́жию о́гненное искуше́ние пости́же. Оба́че в после́дняя вре́мена Боже́ственным промышле́нием явле́но нам бысть ме́сто погребе́ния твоего́ и честны́я мо́щи твоя́, мы же о сем ра́достно пое́м Бо́гу: Аллилу́иа.
Икос 8
Весь испо́лнен бога́тства неисчерпа́емаго, имы́й чистоту́ душе́вную и смиренному́дрие, ве́ру несумне́нную и по́мысл чи́ст, неле́ностно служи́л еси́ Го́сподеви всем житие́м свои́м, блаже́нне Андре́е, юро́дствуя во Христе́. Те́мже, я́ко звезда́ путево́дная све́тиши всем, в житии́ ко Христу́ иду́щим. По́двига ра́ди сего́ высо́каго твоего́ вопие́м ти сицева́я:
Ра́дуйся, мно́гими труды́ се́рдце свое́ очи́стивый;
ра́дуйся, лице́ Госпо́дне узре́вый.
Ра́дуйся, дре́вним святы́м равноче́стный;
ра́дуйся, чудесы́ твои́ми Бо́га просла́вивый.
Ра́дуйся, я́ко прося́щим об избавле́нии от безча́дства ми́лость Бо́жию преклоня́еши;
ра́дуйся, я́ко роди́телем в воспита́нии чад посо́бствуеши.
Ра́дуйся, я́ко непреста́нныя моли́твы о гра́де твое́м прино́сиши;
ра́дуйся, я́ко и о всем ми́ре хода́тайствуеши.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 9
Все житие́ твое́ порабо́тил еси́ за́поведем Христо́вым, я́ко раб благи́й, вся́кия ско́рби и тесноты́ претерпева́я: зауше́ния, оплева́ния, поноше́ния и осмея́ния, ра́достно ше́ствуя у́зким путе́м, блаже́нне Андре́е. Сего́ ра́ди Сам Царь Сла́вы Христо́с ди́вно тя просла́ви и со блаже́нными всели́, с ни́ми же в ве́чнем Его́ Ца́рствии пое́ши а́нгельскую песнь: Аллилу́иа.
Икос 9
Вети́йствующии язы́цы и го́рдии умы́ совопро́сников ве́ка сего́ не возмо́гут по достоя́нию уразуме́ти земно́е житие́ твое́, блаже́нне Андре́е, е́же соверши́л еси́, ше́ствуя ко Христу́. Кто бо дово́лен изрещи́ высоту́ по́двига юро́дства твоего́, кто изочте́т самоотверже́ние твое́ и высоту́ ду́ха твоего́, небе́сный челове́че и земны́й А́нгеле? Мы же, смире́нием твои́м побежда́еми, зове́м ти такова́я:
Ра́дуйся, звездо́ путеводя́щая, от грехо́вныя тьмы избавля́ющая;
ра́дуйся, заре́ пресве́тлая, любо́вию ко Христу́ сия́ющая.
Ра́дуйся, заблу́ждшим на путь ве́рный наставле́ние;
ра́дуйся, стра́нствующим прибе́жище.
Ра́дуйся, в мо́ри жите́йстем мяту́щимся наде́жный ко́рмчий;
ра́дуйся, умудре́ние в тя́жких обстоя́ниих.
Ра́дуйся, серде́ц, во гресе́ закосне́вших, умягче́ние;
ра́дуйся, в ско́рбех и в беда́х утеше́ние.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 10
Спасе́ния хотя́й нам Госпо́дь храни́т вся ко́сти пра́ведных, и ни еди́на от них сокруши́тся, те́мже ди́вно яви́шася мо́щи твоя́, блаже́нне Андре́е, я́ко животво́рный исто́чник благода́ти, омыва́яй скве́рную нечистоту́ душ на́ших. Ты же, свя́те, благода́ть излива́еши всем, с моли́твою к тебе́ притека́ющим и пою́щим Бо́гу: Аллилу́иа.
Икос 10
Стена́ необори́мая яви́лся еси́ гра́ду Симби́рску и стране́ на́шей, кре́пкий помо́щник в беда́х и ско́рбех многомяте́жнаго сего́ жития́. Тебе́ у́бо мо́лим, блаже́нне Андре́е: укроти́ го́рдость ума́ на́шего и научи́ со смире́нием воспева́ти тебе́ си́це:
Ра́дуйся, у́зким путе́м юро́дства ше́ствовавый;
ра́дуйся, Ца́рствия Небе́снаго удо́бно дости́гнувый.
Ра́дуйся, вся пре́лести ми́ра ни во что́же вмени́вый;
ра́дуйся, нището́ю бога́тство ве́чное унасле́дивый.
Ра́дуйся, земны́й а́нгеле и небе́сный челове́че;
ра́дуйся, доброподви́жный безмо́лвниче.
Ра́дуйся, о всех притека́ющих к тебе́ пред Бо́гом предста́телю;
ра́дуйся, благоче́стный наста́вниче от земны́х к Небе́сным.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 11
Пе́ние на́ше моле́бное приими́, блаже́нне о́тче Андре́е, се бо с ве́рою и любо́вию к тебе́ прибега́ем, преклоня́ем пред смире́нием твои́м коле́на се́рдец наших, и мо́лимся ти: умири́ волну́ющееся мо́ре жития́ на́шего, укроти́ смуще́ния челове́ческая, да зове́м Ди́вному во святы́х Свои́х Бо́гу на́шему: Аллилу́иа.
Икос 11
Светопода́тельную звезду́, путеводя́щую нас ко спасе́нию, ны́не возсия́вшую на тве́рди церко́вней, ви́дим тя, блаже́нне Андре́е, и све́том по́двига твоего́ озаря́еми, тве́рдо ве́руем и упова́ем на предста́тельство твое́ пред Го́сподем за нас недосто́йных, и зове́м ти такова́я:
Ра́дуйся, в се́рдце свое́м се́мя Христо́ва уче́ния возрасти́вый;
ра́дуйся, пле́велы го́рдости и превозноше́ния из себе́ исто́ргий.
Ра́дуйся, сокро́вищнице послуша́ния и кро́тости;
ра́дуйся, сто́лпе долготерпе́ния в ско́рбех.
Ра́дуйся, отрече́нием во́ли своея́ безстра́стие стяжа́вый;
Ра́дуйся, во вся дни твоя́ младе́нческое незло́бие сохрани́вый.
Ра́дуйся, в житии меж люде́й мале́йший пребы́вый;
ра́дуйся, в собо́ре Симби́рских святы́х ныне пе́рвенствуяй.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 12
Благода́ть прия́л еси́ от Го́спода, блаже́нне Андре́е, прови́дети духо́вныма очи́ма та́йный грех и сокрове́нный неду́г душе́вный в лю́дех; пода́ждь у́бо нам, грехми́ ослепле́нным, зре́ние помраче́ния и недосто́инства своего́, да исцеле́ние моли́твами твои́ми прии́мше, чи́стым се́рдцем и усты́ ра́достно пое́м а́нгельскую песнь Бо́гу: Аллилу́иа.
Икос 12
Пою́ще твоя́ вели́кия по́двиги, блаже́нне Андре́е, почита́ем самоотверже́ние и юро́дство твое́ во Христе́, кончи́ну же твою́ святу́ю ублажа́юще, сла́вим в немощне́м телеси́ му́жество неизрече́нное и в похвалу́ по́двига земна́го жития́ твоего́ вопие́м ти сицева́я:
Ра́дуйся, пе́рвую за́поведь Христо́ву соверше́нно испо́лнивый;
ра́дуйся, блаже́нство нищеты́ духо́вныя я́ве позна́вый.
Ра́дуйся, я́ко се́ял еси́ во уничиже́нии;
ра́дуйся, я́ко воста́л еси́ во сла́ве.
Ра́дуйся, в селе́ния пра́ведных ле́ствицею доброде́телей возше́дый;
ра́дуйся, ра́ку моще́й твои́х я́ко сосуд, благода́ти по́лный, нам оста́вивый.
Ра́дуйся, гра́ду Симби́рску чу́дное ра́дование;
ра́дуйся, Це́ркве Ру́сския сла́вное украше́ние.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 13
О пресла́вный уго́дниче Христо́в, до́брый тайнови́дче душ челове́ческих, святы́й блаже́нный о́тче Андре́е, кре́пкий наш предста́телю! Приими́ от нас, гре́шных и недосто́йных, сие́ ма́лое моле́ние на́ше, от любве́ тебе́ приноси́мое, и твои́м заступле́нием умири́ на́ша бу́ри жите́йския, укроти́ горды́ню ума́ челове́ческаго, испра́ви наш стро́потный путь и да́руй нам дар покая́ния соверше́ннаго, очи́сти от вся́кия нечистоты́, да вку́пе с тобо́ю вопие́м Спаси́телю на́шему и Го́споду а́нгельскую песнь: Аллилу́иа.
Икос 1
Ангелоподо́бное житие́ провожда́л еси́, блаже́нне Андре́е, по ра́нней бо сме́рти благочести́вых роди́телей твои́х отве́ргл еси́ ми́ру су́етное служе́ние и вся его́ ло́жныя красоты́. Того́ ра́ди услы́ши от нас похвалы́, тебе́ приноси́мыя:
Ра́дуйся, до́браго ко́рене о́трасле благоче́стная;
ра́дуйся, ча́до моли́твы роди́телей боголюби́вых.
Ра́дуйся, от рожде́ния твоего́ Бо́гом избра́нный;
ра́дуйся, от де́тства по́двиг юро́дства на себе́ возложи́вый.
Радуйся, не́мощи пло́ти безро́потно носи́вый;
ра́дуйся, си́лою Бо́жиею укрепля́емый.
Радуйся, на земли́ не име́вый где главу́ подклони́ти;
ра́дуйся, к небе́сному жи́тельству предуста́вленный.
Ра́дуйся, блаже́нне Андре́е, земли́ Симби́рския чу́дная похвало́ и заступле́ние.
Кондак 1
Избра́нный уго́дниче Христо́в, блаже́нне о́тче Андре́е, с ю́ных лет по́двиг отрече́ния от благ жите́йских избра́вый, хвале́бное пе́ние прино́сим тебе́ ны́не, чту́ще святу́ю па́мять твою́. Ты же, я́ко име́яй ве́лие дерзнове́ние к Милосе́рдному Го́споду, от вся́ких нас бед и напа́стей свободи́, да зове́м ти: ра́дуйся, блаже́нне Андре́е, земли́ Симби́рския чу́дная похвало́ и заступле́ние.