МЕ́СЯЦА НОЯБРЯ́ В 27 ДЕ́НЬ
СВЯТА́ГО БЛАЖЕ́ННАГО АНДРЕ́Я СИМБИ́РСКАГО
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры святаго.
Гла́с 2. Подо́бен: Ки́ими похва́льными венцы́:
Ки́ими похва́льными венцы́/ увязе́м блаже́ннаго Андре́я,/ Симби́рския земли́ прозябе́ние и украше́ние,/ измла́да Спа́са на́шего возлюби́вшаго,/ Его́ ра́ди себе́ отве́ргшагося/ и по́двигом юро́дства ми́ру распя́вшагося,/ непреста́нно же о ми́ре те́пле моля́щагося,/ сего́ бо вои́стину досто́йно/ безсме́ртныя сла́вы венце́м/ венча́ет Христо́с Бог наш,// име́яй ве́лию ми́лость.
Ки́ими благогове́йными усты́/ ублажи́м смире́ннаго Андре́я,/ те́ло посто́м удруча́вшаго/ и вре́тищем облача́вшаго,/ ду́шу же Хле́бом Жи́зни пита́вшаго/ и доброде́тельми украша́вшаго,/ блаже́нныя кончи́ны сподо́бльшагося,/ сего́ бо вои́стину досто́йно/ нетле́нием и благоуха́нием моще́й/ просла́вил Христо́с Бог наш,// име́яй ве́лию ми́лость.
Ки́ими пе́сненными добро́тами/ восхва́лим Богому́драго Андре́я,/ про́мыслом Бо́жиим избра́ннаго,/ в земне́м житии́ и по сме́рти/ засту́пника нам дарова́ннаго,/ его́же па́мять и в годи́ну гоне́ний/ ве́рными храни́ма бысть,/ той бо вои́стину досто́йно/ со все́ми святы́ми Це́ркви Ру́сския/ Престо́лу Бо́жия сла́вы предстои́т,// моля́ дарова́ти нам ве́лию ми́лость.
И́ны стихи́ры. Глас 8. Подо́бен: Что вас нарече́м:
Что́ тя́ нарече́м, блаже́нне Андре́е?/ Земна́го ли А́нгела, я́ко блага ми́ра сего́ ни во что́же вмени́л еси́?/ Небе́снаго ли челове́ка, я́ко в Го́рняя устремля́лся еси?/ Проро́ка ли, бу́дущая бо прови́дел и сокрове́нная облича́л еси́?/ Врача́ ли, я́ко душе́вныя и теле́сныя неду́ги цели́ши?/ Ве́лия в житии́ по́двиги подъя́в,/ бли́жним Христа́ ра́ди послужи́л еси́,// Его́же моли́ спасти́ся душа́м на́шим.
Что́ тя́ возимену́ем, свя́те Андре́е?/ По́стников похвалу́, воздержа́нием све́тло оде́явшагося,/ моли́твы столпа́, со благодаре́нием в ней бде́вшаго,/ смире́ния учи́теля, обстоя́ния кро́тко терпе́вшаго,/ ми́лости пода́теля, ни́щия возлюби́вшаго и в Бо́га богате́вшаго,/ безмо́лвия де́лателя, стра́сти уму́ покори́вшаго/ и ум Христов стяжа́вшаго,// Его́же моли́ спасти́ся душа́м на́шим.
Что́ тя́ воспое́м, сла́вне Андре́е?/ Во́ина до́браго Христа́ Бо́га, безпло́тныя враги́ му́жески низложи́вшаго,/ стра́жа гра́да Симби́рска неусы́пнаго,/ свети́льника, Оте́честву мы́сленный свет облиста́ющаго,/ путевождя духо́внаго, к покаянию спасительному нас приводя́щаго,/ исто́чника, исцеле́ния притека́ющим к моще́м твои́м излива́ющаго,/ мно́гая ти имена́ и бо́льшая дарова́ния,// моли́ спасти́ся душа́м на́шим.
Сла́ва, глас 6:
Прииди́те, ве́рнии,/ духо́вно торжеству́юще в па́мяти блаже́ннаго Андре́я,/ вся тщету́ бы́ти вмени́вшаго/ за превосходя́щее разуме́ние Христа́ Иису́са Го́спода на́шего,/ и от Саро́вскаго чудотво́рца похвала́ми просла́вленнаго,/ и я́коже дре́вле на погребе́ние его́ вси лю́дие гра́да любо́вию снидо́шася,/ та́ко и ны́не мы благода́тным моще́м его́ покланя́ющеся, те́пле возопии́м:/ о уго́дниче Бо́жий, при́зри на нас, и и́хже собра́л еси́ зде,/ во Ца́рствии Небе́снем собери́ в ча́сти спаса́емых,/ и́мать бо тя Симби́рская земля́/ моли́твенника и предста́теля к Бо́гу// о ве́рою и любо́вию чту́щих святу́ю па́мять твою́.
И ны́не, Богородичен воскресен.
Вхо́д. Проки́мен дне́. И чте́ния сия:
Ца́рств пе́рвых чте́ние (гл. 21, 10–15; 22, 1–2):
В той день воста́ Дави́д, и убеже́ от лица́ Сау́лова,/ и прии́де Дави́д ко Анху́су, царю́ Ге́фску./ И ре́ша о́троцы Анху́совы к нему́:/ не сей ли Дави́д, царь земли́?/ не сему́ ли изыдо́ша жены́ лику́ющия, глаго́люща:/ победи́ Сау́л с ты́сящами свои́ми и Дави́д со тьма́ми свои́ми./ И положи́ Дави́д глаго́лы сия́ в се́рдцы свое́м,/ и убоя́ся зело́ от лица́ Анху́са, царя́ Ге́фска./ И измени́ лице́ свое́ пред ним,/ и притвори́ся в день той, и бия́ше во врата́ гра́да, я́ко в тимпа́н,/ и па́даше на ру́ки своя́, и паде́ у врат гра́да,/ и сли́ны своя́ точа́ше по браде́ свое́й./ И рече́ Анху́с ко отроко́м свои́м:/ се ви́десте му́жа неи́стова,/ почто́ его́ введо́сте ко мне?/ Еда́ не име́ю аз неи́стовых, я́ко введо́сте его́,/ да бесну́ется предо мно́ю?/ сей да не вни́дет в дом мой./ И оты́де Дави́д отту́ду, и спасе́ся,/ и прии́де в пеще́ру Одолла́мску;/ и слы́шавше бра́тия его́ и дом отца́ его́, приидо́ша к нему́ та́мо./ И собра́шася к нему́ всяк, и́же в ну́жде,/ и всяк должни́к, и всяк печа́льный душе́ю,/ и бе и́ми облада́яй, и бя́ше с ним я́ко четы́реста муже́й.
Проро́чества Иса́иина чте́ние (гл. 20):
В ле́то, вне́же вни́де Танафа́н во Азо́т,/ егда́ по́слан бысть от Арны́, царя́ Ассири́йскаго,/ и воева́ на Азо́т, и взя его́,/ тогда́ рече́ Госпо́дь ко Иса́ии, сы́ну Амо́сову, глаго́ля:/ иди́ и све́рзи вре́тище со чресл свои́х,/ и санда́лия твоя́ иззу́й с ног твои́х,/ и сотвори́ си́це, ходя́ наг и бос./ И рече́ Госпо́дь:/ я́коже ходи́л раб мой Иса́ия наг и бос три ле́та,/ три ле́та бу́дут зна́мения и чудеса́ еги́птяном и ефио́пляном,/ я́ко та́кожде отведе́т царь Ассири́йск плен еги́петск и ефио́пск,/ ю́ноши и ста́рцы, на́ги и бо́сы, открове́ны во стыде́ние Еги́пту./ И постыдя́тся побежде́ни еги́птяне о ефио́плянех,/ на ни́хже упова́ху еги́птяне,/ бя́ху бо им сла́ва./ И реку́т живу́щим на о́строве сем в день о́ный:/ се, мы бе́хом упова́юще бежа́ти к ним на по́мощь,/ и́же не мого́ша спасти́ся от царя́ Ассири́йска,/ и ка́ко мы спасе́мся?
Пророчества Исаиина чтение (глава 58):
Тако глаголет Господь: разве́рзется ра́но свет тво́й, и исцеле́ния твоя́ ско́ро возсия́ют, и предъи́дет пред тобо́ю пра́вда твоя́, и сла́ва Бо́жия объи́мет тя́. Тогда́ воззове́ши, и Бо́г услы́шит тя́, и еще́ глаго́лющу ти́, рече́т: се́, приидо́х. А́ще отъи́меши от себе́ соу́з и рукобие́ние и глаго́л ропта́ния и да́си а́лчущему хлеб от души́ твоея́ и ду́шу смире́нную насы́тиши, тогда́ возсия́ет во тме свет тво́й, и тма́ твоя́ бу́дет я́ко полу́дне, и бу́дет Бо́г тво́й с тобо́ю при́сно: и насы́тишися, я́коже жела́ет душа́ твоя́, и ко́сти твоя́ утучнеют, и бу́дут я́ко вертогра́д напое́н, и я́ко исто́чник, ему́же не оскуде вода́: и ко́сти твоя́ прозя́бнут я́ко трава́, и разботеют, и наследят ро́ды родо́в. И сози́ждутся пусты́ни твоя́ вечныя, и бу́дут основа́ния твоя́ вечная родо́м родо́в: и прозове́шися зда́тель огра́д, и стези́ твоя́ посреде упоко́иши. А́ще отврати́ши но́гу твою́ от суббо́т, е́же не твори́ти хотений твои́х в де́нь святы́й, и прозове́ши суббо́ты сла́достны, свя́ты Богови твоему́: не воздви́гнеши ноги́ своея́ на дело, ниже́ возглаго́леши словесе́ во гневе изъ у́ст твои́х, и бу́деши упова́я на Го́спода, и возведе́т тя́ на благоты́ земны́я, и ухлебит тя́ наследием Иа́кова отца́ твоего́: уста́ бо Госпо́дня глаго́лаша сия́.
На лити́и стихи́ра хра́ма и свята́го, глас 2:
Днесь сла́вится во гра́де Симби́рске/ Христо́ва Вознесе́ния храм,/ иде́же блаже́нный Андре́й усе́рдно моли́твы творя́ше,/ и а́ще в ле́та лю́тая от богобо́рцев разру́шен бысть,/ оба́че молитвами уго́дника Бо́жия па́ки воздвижеся,/ и па́че пре́жняго просла́вися, име́я мо́щи его́ в себе́,/ исцеле́ния точа́щия и сла́ву Бо́жию явля́ющия// и притека́ющия к ним ве́рныя освяща́ющия.
Сла́ва, свята́го, гла́с 5:
Ра́дуются днесь ча́да Це́ркве Ру́сския,/ пра́зднующа па́мять блаже́ннаго Андре́я,/ и́же юро́дством Бо́жию Прему́дрость пропове́да,/ и тле́нная одея́ния отве́ргнув,/ в ри́зу спасе́ния облече́ся,/ и те́рния страсте́й искорени́в,/ я́ко крин, чистото́ю и чудесы́/ зе́млю Симби́рскую облагоуха́,/ ны́не же со А́нгелы Святе́й Тро́ице предстои́т,// моля́ дарова́ти нам мир и ве́лию ми́лость.
И ны́не, Богородичен воскресен.
На стихо́вне стихиры святаго, гла́с 4.
Подобен: Дал еси знамение:
Да́л еси́ утвержде́ние/ гра́ду Симби́рску, Го́споди,/ блаже́ннаго Андре́я,/ и́же Кресто́м Твои́м огражда́ем,/ бесо́вская ополче́ния посрами́л есть./ Того моли́твами/ изба́ви гра́д се́й и страну́ на́шу/ от вся́каго обстоя́ния,/ Иису́се Милосе́рде,// Спа́се ду́ш на́ших.
Сти́х: Блаже́н муж боя́йся Го́спода// в за́поведех Его́ восхо́щет зело́.
Да́л еси́ зна́мения/ твори́ти уго́днику Твоему́, Го́споди:/ гряду́щая обра́зно возвеща́ти/ и к ча́су сме́ртному люди уготовля́ти,/ боле́зни врачева́ти/ и скорбя́щия утеша́ти,/ духо́в злых отгоня́ти/ и от напра́сныя сме́рти избавля́ти,// Иису́се Милосе́рде,// Спа́се ду́ш на́ших.
Сти́х: Пра́ведник, я́ко фи́никс процвете́т,// я́ко кедр, и́же в Лива́не, умно́жится.
Да́л еси́ украше́ние/ гра́ду Симби́рску, Го́споди:/ честны́я мо́щи/ блаже́ннаго Андре́я,/ сокро́вище чуде́с неистощи́мое,/ освяще́ние и исцеле́ние точа́щее/ с ве́рою припа́дающим к ним,/ те́мже Ди́внаго во святы́х Свои́х сла́вим Тя,/ Иису́се Милосе́рде,// Спа́се ду́ш на́ших.
Сла́ва, гла́с 8.
Те́сным путе́м ше́ствуя, блаже́нне Андре́е,/ ве́ку сему́ не сообразова́лся еси́,/ но юро́д быв пред му́дростию плотско́ю,/ преобрази́ся обновле́нием ума́ твоего́ Ду́хом Святы́м,/ уразумева́я во́лю Бо́жию/ благу́ю и уго́дную и соверше́нную,/ и спасе́нию бли́жних послужи́в,/ у́зкими враты́ в жизнь ве́чную вшел еси́,/ те́мже помози́ чту́щим тя в за́поведех Госпо́дних ходи́ти,/ да сподо́бимся услы́шати жела́емый глас Христа́ Бо́га на́шего:/ прииди́те, благослове́нии Отца́ Моего́,// насле́дуйте угото́ванное вам Ца́рствие от сложе́ния ми́ра.
И ны́не, Богородичен воскресен: Безневестная Дево:
На благословении хлебов тропарь святаго дважды и Богородице Дево: единожды.
Тропарь, глас 4:
Небе́сный наш засту́пниче,/ пред Бо́гом усе́рдный моли́твенниче,/ гра́да Симби́рска утеше́ние и похвало́,/ в ско́рбех и беда́х ско́рый помо́щниче,/ блаже́нне Андре́е, ны́не к тебе́ вопие́м:/ простри́ нам ру́ку по́мощи твоея́// и на путь покая́ния наста́ви.
НА У́ТРЕНИ
На Бог Господь: тропарь святаго дважды. Слава, и ныне: Богородичен: Еже от века утаенное:
По 1-м стихосло́вии, седа́лен, гла́с 4:
Подо́бен: Яви́лся еси́ днесь:
От младе́нства отве́рглся еси́ себе́, блаже́нне Андре́е,/ и крест твой взем, Христу́ после́довал еси́ невозвра́тным по́мыслом,/ до́ндеже в соедине́ние ве́ры и позна́ния Сы́на Бо́жия,/ в му́жа соверше́нна, в ме́ру во́зраста исполне́ния Христо́ва дости́гл еси́,/ те́мже и нас на путь пра́вый наста́ви, мо́лимся.
Сла́ва, и ны́не, Богородичен, глас тойже:
Мно́жицею изба́вися ро́д челове́ческий от зо́л и бе́д,/ моля́ся пре́д Твои́ми, о Богома́ти, святы́ми ико́нами:/ приими́, Влады́чице, вся́ моле́ния ве́рных,/ о избавле́нии гра́да сего́ и страны́ на́шея от лю́тых бе́д несогла́сия,// предста́тельством твои́м.
По 2-м стихосло́вии седа́лен, глас 1.
Подо́бен́: Гро́б Тво́й, Спа́се:
Бу́йство Христа́ ра́ди я́ко духо́вную му́дрость стяжа́в,/ со апо́столом благоволи́л еси́ в досажде́ниих и теснота́х,/ а́лчбе и жа́жде, зи́ме и наготе́,/ благу́ю часть избра́в, о еди́ном на потре́бу печа́шеся,/ те́мже си́ла Спа́сова, в нем́ощи соверща́ющаяся, всели́ся в тя,/ ея́же прича́стниками и нам бы́ти помоли́ся.
Сла́ва и ны́не, Богородичен, гла́с и подо́бен то́йже.
Пречи́стая Твоя́ ико́на, Богоро́дице Де́во,/ врачевство́ гра́ду Твоему́ дарова́ся духо́вное:/ к не́йже приходя́ще покланя́емся и честву́ем,/ и от жела́ния се́рдца целу́ем, исцеле́ний благода́ть почерпа́юще,/ и неду́г теле́сных, и душе́вных страсте́й,/ Твои́ми моли́твами свобожда́емся.
Велича́ние:
Велича́ем тя́,/ святы́й блаже́нный Андре́е,/ и чти́м святу́ю па́мять твою́,/ ты́ бо́ мо́лиши о на́с/ Христа́ Бо́га на́шего.
Псало́м избра́ный:
Блаже́н муж, и́же не призре́ в суеты́ и неистовле́ния ло́жная.
Бо́же, Ты уве́дел еси́ безу́мие мое́.
Отврати́ о́чи мои́, е́же не ви́дети суеты́.
Тебе́ ра́ди претерепе́х поноше́ние, покры́ срамота́ лице́ мое́.
За словеса́ усте́н Твои́х аз сохрани́х пути́ же́стоки.
Чужд бых бра́тии мое́й и стра́нен сыново́м ма́тере мое́я.
А́з бых поноше́ние им; ви́деша мя, покива́ша глава́ми свои́ми.
Положи́х одея́ние мое вре́тище, и бых им в при́тчу.
Ты ве́си поноше́ние мое, и студ мой и срамоту́.
Изво́лих примета́тися в дому́ Бо́га моего́ па́че, не́же жи́ти ми в селе́ниих гре́шничих.
Лу́чше ма́лое пра́веднику, па́че бога́тства гре́шных мно́га.
Терпя́щии Тя не постыдя́тся.
Се́ющии слеза́ми, ра́достию по́жнут.
Ра́дуйтеся, пра́веднии, о Го́споде, пра́вым подоба́ет похвала́.
Сла́ва, и ны́не. Аллилу́иа, аллилу́иа, аллилу́иа, сла́ва Тебе́, Бо́же (трижды).
По полиеле́и седа́лен, гла́с 8.
Подо́бен: Повеле́нное:
Себе́ сама́го в же́ртву Го́сподеви принесы́й, блаже́нне Андре́е,/ мно́гих даро́в Ду́ха Свята́го/ на по́льзу наро́да Бо́жия сподо́бился еси́:/ ве́рою исцеле́ния и чудотворе́ния соде́я и си́лу о́гненную угаси́,/ чистото́ю се́рдца прозре́ние стяжа́,/ смире́нием духов злых изгна́,/ любо́вию же соверше́нне бли́жним послужи́,/ е́юже посети́ тя велича́ющия.
Сла́ва, и ны́не, Богородичен, глас и подобен тойже.
Благодари́м Тя при́сно, Богоро́дице,/ и велича́ем, Чи́стая, и покланя́емся,/ воспева́юще Рождество́ Твое́, Благода́тная, вопию́ще непреста́нно:/ спаси́ ны, Де́во Всеми́лостивая, я́ко Блага́я,/ и де́монов исхити́ словоположе́ния стра́шнаго в час испыта́ния,/ да не посрами́мся, раби́ Твои́.
Степе́нна, 1-й антифо́н 4-го гла́са.
Проки́мен, гла́с 4: Аз есмь нищь и убог,/ Господь попечется о мне. Стих: Терпя́ потерпе́х Го́спода, и внят ми, и услы́ша моли́тву мою́. Ева́нгелие от Матфе́я, зач. 43.
По 50-м псалме́ стихи́ра, глас 6:
Егда́ блаже́нное успе́ние твое́,/ уго́дниче Бо́жий, наста́,/ всего́ гра́да Симби́рска и окре́стных ве́сей/ мно́жество наро́да соше́дшеся,/ умиле́нно вопия́ху:/ а́ще и гроб покры́ многострада́льное твое́ те́ло,/ но ду́хом не оста́ви нас си́рых, ми́лостиве о́тче,/ буди с на́ми любо́вию, я́же николи́же отпа́дает./ Мы же ны́не во святы́х тя прославля́юще/ и мо́щи твоя́ благогове́йно обстоя́ще,/ благода́рно велича́ем,/ я́ко Рус́ская земля́ неусы́пна тя и́мать предста́теля/ и моли́твенника ко Святе́й Тр́оице,// блаже́нне Андре́е.
Кано́н Богородицы и свята́го, его́же краегране́сие: Отве́ргся себе́ и Христу́ после́довал еси. Гла́с 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́ Моисе́йский жезл,/ крестообра́зно порази́в и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.
Очеса́ у́мныя серде́ц на́ших от суеты́ отврати́м,/ да возмо́жем зре́ти высоту́ по́двигов блаже́ннаго Андре́я,/ земли́ Симби́рския засту́пника,/ просла́вльшему его́ Бо́гу// благода́рственная воспева́юще.
Твоего́ смире́ния глубине́,/ моли́тве неотсту́пности и воздержа́ния тве́рдости/ Богозва́нне Андре́е, А́нгели удиви́шася,/ укрепля́ющаго немощно́е челове́ческое естество́// Бо́га воспева́юще.
Вся мудрова́ния пло́ти покори́л еси́ ду́ху,/ измла́да бо позна́, свя́те Андре́е,/ я́ко бу́ее Бо́жие прему́дрее челове́к есть,/ те́мже стра́сти и ко́зни вра́жия препобеди́л еси́,// возлю́бльшаго нас Спа́са воспева́юще.
Богоро́дичен: Еди́ну Чи́стую и Благослове́нную,/ всех христиа́н Храни́тельницу/ и гра́да Симби́рска Врата́рницу,/ чтим Тя, Богоро́дице,// заступле́ние Твое́ непреста́нно воспева́юще.
Катавасия: Христос раждается:
Песнь 3
Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты́ мене́ утверди́ в любви́ Твое́й,/ жела́ний Кра́ю, ве́рных Утвержде́ние,// Еди́не Человеколю́бче.
Разуме́ти возмо́гл еси́,/ блаже́нне Андре́е,/ преспе́ющую ра́зум любо́вь Христо́ву,/ е́юже обдержи́м быв,/ Бо́гу и бли́жним в Симби́рске послужи́л еси́,/ сподо́бився благода́тию испо́лнитися// Еди́наго Человеколю́бца.
Госпо́дни за́поведи творя́,/ дае́мое ти ни́щим раздава́л еси́,/ та́ко и нас, доброде́тельми убо́гих,/ ми́лостивно попече́нием твои́м посети́// и нищеты́ духо́вныя дости́гнути испроси́// у Еди́наго Человеколю́бца.
Суему́дрия и высокоу́мия па́губных/ моли́ изба́витися нам, Богому́дре Андре́е,/ и помози́ му́дрствовати в целому́дрии,/ коему́ждо я́коже раздели́л есть ме́ру ве́ры Госпо́дь,// Еди́н Человеколю́бец.
Богоро́дичен: Явле́нием Каза́нскаго о́браза Твоего́, Влады́чице,/ сла́вится оби́тель Жа́довская/ отону́дуже ше́ствием ико́ны сея́/ вся преде́лы Симби́рския огражда́еши/ и о Руси́ Правосла́вней мо́лиши// Еди́наго Человеколю́бца.
Седа́лен святаго, глас 8.
Подо́бен: Прему́дрости:
Пре́жде мирска́го позна́ния/ Творца́ уве́дел еси́, прему́дре Андре́е,/ и свы́ше зван быв на по́двиг изря́ден,/ гото́во се́рдце мое́, Бо́же, вопия́л еси́,/ бу́йством же про́поведи и благода́тными да́ры спасе́нию ве́рующих послужи́в,/ ны́не пребыва́еши в тех, и́хже о́ко не ви́де, и у́хо не слы́ша,/ и на се́рдце челове́ку не взы́де,/ я́же угото́ва Бог лю́бящим Его́,// и мо́лишися о чту́щих святу́ю па́мять твою́.
Слава, и ны́не, Богородичен, глас тойже:
Ма́ти Бо́жия, Де́во Чи́стая,/ зе́млю Ру́сскую возлюби́вшая,/ заступи́ гра́д Симби́рск и лю́ди,// ко Христу́ приходя́щия.
Песнь 4
Ирмо́с: Ты́ моя́ кре́пость, Го́споди,/ Ты́ моя́ и си́ла,/ Ты́ мо́й Бо́г, Ты́ мое́ ра́дование,/ не оста́вль не́дра О́тча,/ и на́шу нищету́ посети́в./ Те́м с проро́ком Авваку́мом зову́ Ти́:// си́ле Твое́й сла́ва, Человеколю́бче.
Стра́хом Бо́жиим испо́лнен быв,/ и́же есть нача́ло и вене́ц прему́дрости, / боя́тися Го́спода и бе́гати греха́ лю́ди наставля́л еси́,/ да на Стра́шнем Суд́е десны́я страны́ сподо́бятся// ми́лостию Человеколю́бца.
Е́же жи́ти ми Христо́с/ и смерть приобре́тение,/ со апо́столом помышля́л еси́,/ и кончи́ну земна́го жития́/ мно́гим предуказа́л еси́,/ сего́ ра́ди па́мять сме́ртную дарова́ти сла́вящим тя// умоли́ Го́спода Человеколю́бца.
Безу́мен быв ми́ру, свя́те Андре́е,/ оба́че Христу́,/ Бо́жией Прему́дрости, усво́ился еси́,/ И́же смире́нным дае́т благода́ть,/ и си́лу свы́ше прии́м бе́сы изгоня́ти,// вся твори́л еси́ во сла́ву Го́спода Человеколю́бца.
Богоро́дичен: Еди́ну во всех ро́дех Ма́терь и Де́ву воспева́ем Тя,/ знам́ения ми́лости Твоея́ при́сно явля́ющую,/ и приле́жно вопие́м:/ побе́ды на неви́димых и ви́димых враг да́руй,// моля́щи Сы́на Твоего́, Человеколю́бца.
Песнь 5
Ирмо́с: Вску́ю мя́ отри́нул еси́/ от Лица́ Твоего́, Све́те Незаходи́мый,/ и покры́ла мя́ е́сть чужда́я тьма́ окая́ннаго,/ но обрати́ мя́ и к све́ту за́поведей Твои́х// пути́ моя́ напра́ви, молю́ся.
Избра́нниче Бо́жий, достоблаже́нне Андре́е,/ Святы́м Ду́хом просвеще́н быв,/ мно́гажды от бед согра́жданы избавля́л еси́,/ от тьмы грехо́вныя к покая́нию обраща́я,// и нас к све́ту за́поведей Христо́вых напра́ви, мо́лимся.
Храни́ло усто́м твои́м/ псало́мски положи́л еси́, быв я́ко нем,/ оба́че гряду́щая бли́жним открыва́л еси́,/ зна́мении и дея́нии хотя́щая бы́ти показу́я,// те́мже да не укло́нятся сердца́ на́ша в словеса́ лука́вствия, помоли́ся.
Раз́ум в послуша́ние Христо́во пле́нив,/ труды́ и боле́зньми чистоту́ се́рдца стяжа́л еси́, свя́те Андре́е,/ без нея́же никто́ не у́зрит Го́спода,// и ны́не почита́ющим тя помози́ се́рдце от со́вести лука́выя очи́стити, мо́лимся.
Богоро́дичен: Излия́нное ми́ро нарече́ся/ Сын Твой и Бог, Пречи́стая,/ Твои́ же сосу́ди душе́внии,/ по́лнии ми́ра Свята́го Ду́ха,/ благода́ть миродохнове́нную на о́браз Твой излия́ша,// чрез него́же отра́ду и утеше́ние да́руй нам, мо́лимся.
Песнь 6
Ирмо́с: Во Исаа́це страсть прописа́вый,/ и во Ио́не погребе́ние прообразова́вый,/ и Воскресе́ние всем подая́й,/ Тебе́ вопие́м с проро́ком:// от тли нас возведи́, Благоутро́бне Го́споди.
Себе́ отве́ргся и ми́ру распя́вся,/ Христу́ после́дова блаже́нный Андре́й,/ и в наде́жди воскресе́ния во Ца́рствии Небе́снем ны́не пребыва́ет,/ иде́же со все́ми святы́ми// мо́лит о нас Благоутро́бнаго Го́спода.
Тая́ся скверн ми́ра,/ А́нгельски во пло́ти поживе́ ди́вный Андре́й,/ зной и мраз, глад и жа́жду,/ бие́ние и поруга́ние кро́тце претерпева́я,// того́ моли́твами от тли душе́вных скверн нас возведи́, Благоутро́бне Го́споди.
Украше́ние Во́лжских преде́лов/ и гра́да Симби́рска утвержде́ние,/ и ве́рных на путь спасе́ния наста́вниче,/ ра́досте на́ша, свя́те Андре́е, любо́вию тебе́ вопие́м:// хода́тай бу́ди о нас пред Благоутро́бным Го́сподом.
Богоро́дичен: При́зри на лю́ди, притека́ющия к Твоему́ честно́му о́бразу,/ Боголюби́вая Цари́це, Де́во Богоро́дице,/ его́же в преде́лех Симби́рских просла́вила еси́,/ и моли́ о нас при́сно Благоутро́бнаго Го́спода.
Конда́к, глас 4:
Плотско́е мудрова́ние нивочто́же вмени́в,/ юро́дством Христа́ ра́ди обле́клся еси́,/ духо́вную же нищету́ стяжа́в,/ Ца́рствие Небе́сное насле́довал еси́,/ иде́же Престо́лу Бо́жию предстоя́,/ немо́лчно о нас ко Христу́ взыва́еши,// блаже́нне Андре́е, преди́вный чудотво́рче.
И́кос:
Ева́нгелию вои́стинну после́довал еси́:/ зло́бою младе́нствуя, умо́м же соверше́н быв,/ разу́мное о́ко души́ све́том Христо́вым просвеще́но име́я,/ вта́йне моля́ся Отцу́ Небе́сному и бе́гая похвалы́ челове́ческия,/ ми́лостынею сокро́вище на Небеси́ собра́в,/ попече́ние отве́ргнув о я́стии, питии́ и те́ла облаче́нии,/ Ца́рствия Бо́жия и пра́вды еѓо пре́жде всего́ взыска́л еси́,/ иде́же во славе пребыва́я, помина́й любо́вию чту́щия тя,// блаже́нне Андре́е, преди́вный чудотво́рче.
Песнь 7
Ирмо́с: Бо́жия снисхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:// благослове́н еси́, Бо́же оте́ц на́ших.
Одея́ния тле́нная отве́ргнув,/ в ле́поту доброде́телей облече́ся/ и стопа́ми необуве́нными ше́ствуя, я́коже Моисе́й у купины́ иногда́,/ на вся́ком ме́сте влады́чества Его́// благословля́л еси́ Бо́га оте́ц на́ших.
Слеза́ми моли́твенными и по́ты боле́зненными/ сто́гны гра́да Симби́рска ороша́я,/ от запале́ния о́гненнаго той соблюда́л еси́,/ и ныне угаси́ пла́мень страсте́й чту́щих тя,// да пое́м Бо́га оте́ц на́ших.
Любо́вию и ре́вностию о Христе́ пламене́я,/ хла́дная сердца́ возгрева́л еси́, блаже́нне Андре́е,/ ожесточе́нныя обра́зне вразумля́я/ и немощны́я от паде́ний огражда́я// моли́твою те́плою к Бо́гу оте́ц на́ших.
Богоро́дичен: Ея́же та́инство купино́ю неопали́мою на Сина́и дре́вле прообразова́,/ Тоя́ и ико́ну от Святы́я Горы́ во гра́де Симби́рске просла́ви,/ дарова́в Присноде́ву ве́рным в прибе́жище и покро́в,// Бог оте́ц на́ших.
Песнь 8
Ирмо́с: Седмери́цею пе́щь,/ халде́йский мучи́тель,/ Богочести́вым неи́стовно разжже́,/ си́лою же лу́чшею, спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся́ ве́ки.
Ди́вно твое́ житие́,/ и блаже́нна кончи́на,/ я́ко бо зла́то в горни́ле по́двигов искуси́вся/ и огнь Божества́ причаще́нием Животворя́щих Та́ин прия́в,/ в ми́ре дух твой Жела́емому пре́дал еси́,/ свяще́нницы же и лю́дие/ Творца́ и Изба́вителя воспева́ху,// И́же вчера́ и днесь, То́йже и во ве́ки.
Общий плач вси лю́дие Симби́рстии,/ на погребе́ние твое́ стекшеся,/ вознесше, глаголаху:/ не забу́ди чад твои́х, свя́те,/ твоя́ бо душа́ я́ко пшени́ца зре́лая в Небе́сную жи́тницу затворе́на бысть,/ и помози́ нам ве́ре твое́й подража́ти,/ а не пле́велы яви́тися,// и́мже угото́ван огнь неугаса́емый во ве́ки.
Во огни́ гоне́ний/ ве́рнии слеза́ми/ разоре́нное ме́сто погребе́ния твоего́ ороша́ху,/ си́лою же Бо́жиею спасе́ны мо́щи твоя́ ви́девше,/ Творцу́ и Изба́вителю вопия́ху:/ о́троцы, благослови́те,/ свяще́нницы, воспо́йте,// лю́дие, превозноси́те во вся́ ве́ки.
Богоро́дичен: А́ще и в земли́/ сокры́та бысть свята́я ико́на Твоя́,/ Влады́чице Богоро́дице,/ но яви́ся храни́тельница оби́тели/ честна́го Успе́ния Твоего́,/ Засту́пнице усе́рдная,/ и во вре́мя лю́то от безбо́жных неврежде́на бысть,// да пое́м ми́лость Твою́ во ве́ки.
Песнь 9
Ирмос: Ужасе́ся о се́м Не́бо/ и земли́ удиви́шася концы́,/ я́ко Бо́г яви́ся челове́ком пло́тски/ и чре́во Твое́ бы́сть простра́ннейшее Небе́с./ Те́м Тя́, Богоро́дицу// А́нгелов и челове́к чинонача́лия велича́ют.
Любо́вию воспева́юще/ ди́вное твое́ заступле́ние,/ блаже́нне Андре́е,/ и ве́рою прие́млюще мно́жество исцеле́ний,/ от чудотво́рных моще́й твои́х источа́емых,// Ди́внаго во святы́х Свои́х Бо́га велича́ем.
Еди́наго Го́спода возлюби́вый,/ в земне́м жити́и Ему́ по́двиги изря́дными угоди́вый/ и на Небеси́ с Ним ны́не пребыва́яй,/ при́зри ми́лостивым о́ком,/ свя́те Андре́е,// на ча́да Це́ркве Ру́сския, тя велича́ющия.
Сра́дуйтеся днесь гра́ду Симби́рску/ вся гра́ды и ве́си Ру́сския земли́,/ в све́тлой па́мяти присноблаже́ннаго Андре́я,/ его́же я́ко моли́твы кади́ло благоуха́нное/ у Престо́ла Бо́жия// и хода́тая о ве́рных тепле́йшаго велича́ем.
Богоро́дичен: Изба́вляеши от бе́д и зол,/ Всеблага́я Скоропослу́шнице,/ моля́щихся пре́д Твои́ми святы́ми ико́нами,/ напая́я благода́тию ду́ши и врачу́я телеса́ на́ша,// тем Тя вси благода́рне велича́ем.
Свети́лен.
Подо́бен: Посети́л ны́ е́сть:
Све́том Христо́вым просвеще́н,/ Богомуд́ре Андре́е,/ озари́ умы́ и сердца́ на́ша,/ неве́дения и прегреше́ний мгло́ю омраче́нныя,/ да в ра́зум и́стины прии́дем// моли́твами твои́ми.
Сла́ва, и ны́не, Богородичен. Подо́бен то́йже:
Возжела́в Твоея́ добро́ты Иису́с, Пречи́стая,/ в Тя́ всели́ся,/ и Тебе́ Засту́пницу гра́ду Твоему́ Слово́ Бо́жие дарова́./ Его́же сохраня́й заступле́нием Твои́м при́сно,/ я́ко да Тя́ ублажа́ем,// Пренепоро́чная Отрокови́це.
На хвали́тех стихи́ры, гла́с 8:
Подобен: О, пресла́внаго чудес́е:
О, пресла́внаго чудесе́!/ Земли́ Симби́рския ди́вное прозябе́ние,/ Андре́й досточу́дный/ Це́рковию Ру́сскою прославля́ется днесь./ Торжеству́ют христоимени́тии лю́дие,/ велича́юще свята́го сро́дника своего́./ О, каковы́й предста́тель нам дарова́ся!/ Его́же моли́твами, Христе́, спаси́ ду́ши на́ша,// я́ко Един Благоутро́бен.
О, пресла́внаго чудесе́!/ Ка́ко твоему́ гра́ду, блаже́нне Андре́е,/ явле́но многоцеле́бное сокро́вище мо́щи твоя́,/ от гони́телей попра́нныя, но не истребленныя,/ яже ны́не обстоя́ще и любо́вию лобыза́юще,/ ми́лости от тебе́ прие́млет люде́й мно́жество./ О, ве́лиих дарова́ний твои́х, свя́те,/ и́миже Христо́с тя прослави,// я́ко Един Благоутро́бен.
О, пресла́внаго чудесе́!/ Неистощи́мый исто́чник исцеле́ний/ в земли́ Ру́сской явля́ет Госпо́дь,/ и блаже́ннаго Андре́я прославля́ет,/ гра́да Симби́рска похвалу́ и заступле́ние,/ и́же мо́лится непреста́нно/ о земне́м Оте́честве свое́м/ ко Христу́ Бо́гу на́шему,// Еди́ному Благоутро́бному.
Сла́ва, глас 8:
Умо́м, просвеще́нным благода́тию,/ Пресвяте́й Тро́ице предстоя́,/ и Тоя́ сла́вою осеня́емый, свя́те Андре́е,/ в блаже́ннем со́нме юро́дивых Христа́ ра́ди/ о Го́споде хва́лишися,/ и озаряе́ши ве́рных ра́зумы доброде́телей светлостьми́,/ те́мже ра́достно пра́зднующе па́мять твою́, уми́льно глаго́лем:/ помина́й любо́вию чту́щия тя/ и моли́ Це́рковь Святу́ю утверди́ти,/ мир ми́рови дарова́ти// и душа́м на́шим ве́лию ми́лость.
И ны́не, Богородичен, гла́с тойже.
Влады́чице, приими́ моли́твы раб Твои́х,/ и изба́ви нас// от вся́кия ну́жды и печа́ли.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пре́д Го́сподем/ сме́рть преподо́бных Его́. Сти́х: Что́ возда́м Го́сподеви о все́х, я́же воздаде́ ми? Апо́стол к Гала́том, зача́ло 213. Аллилу́иа, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О ди́вный уго́дниче Бо́жий, преблаже́нне Андре́е! Ты измла́да Богом просвеще́н и призва́н быв, кре́ст свой на раме́на прия́л еси́, распя́вся ми́рови и после́дуя Спа́су Христу́, за́поведи Его́ со тща́нием исполня́я. Вся́кое плотско́е мудрова́ние и пристра́стие отве́ргнув, под покро́вом безу́мия мни́маго в нищете́ духо́вней смиренному́дренно бли́жним чрез все житие́ послужи́л еси, неизрече́нною любо́вию Христо́вою укрепля́яся. Те́мже Госпо́дь Сла́вы в тебе́ просла́вися и тя просла́ви, и ве́чное блаже́нство восприя́ти сподо́би. Еще же и мо́щи твоя́ святыя в лета гоне́ний лю́тых сохрани́ и в возсозда́ннем хра́ме Боголе́пнаго Вознесе́ния Своего́ поста́ви, исцеления неоскудная от них изливая: ты бо не токмо приходящих к раце мощей твоих, но и во ины́х ме́стех призыва́ющих тя николи́же оставля́еши и благода́тную по́мощь оби́льно им являеши.
Мы же, гре́шнии, преклоня́юще коле́на серде́ц на́ших пред высото́ю по́двига твоего́, приле́жно мо́лим тя, Богому́дре Андре́е: я́коже в земне́м житии́ хранение усто́м твои́м положи́в, немо́лчным се́рдцем вопия́л еси́ к Бо́гу, не премолчи́ у́бо и ны́не ко Го́споду о нас, любо́вию чту́щих тя, и испроси́ нам покая́ние во гресе́х, от поро́ков и страсте́й свобожде́ние, душа́м и телесе́м цельбу, в ско́рбех утеше́ние и по́мощь. Бу́ди засту́пник усе́рден во всем житии́ на́шем, наипаче же еди́наго на потре́бу жела́ти и в моли́тве проси́ти помози́.
Ей, свя́тче Бо́жий, умоли́ Всеблага́го Го́спода на́шего, да утверди́т Це́рковь Правосла́вную, град сей, (весь сию́), зе́млю Симби́рскую и все Оте́чество на́ше от вся́каго зла в ми́ре сохрани́т, да предста́тельством твои́м соблюда́еми, сла́вим ве́лие долготерпе́ние к нам недосто́йным Отца́ и Сы́на и Свята́го Ду́ха ны́не, и при́сно, и во ве́ки веко́в. Ами́нь.